Як Бог пусціў сонца ў хату

Як Бог пусціў сонца ў хату

На пачатку свету людзі не ведалі, як хату ставіць. Нарэшце паставілі якуюсь хату, але не ведалі, што зрабіць, каб у ёй святло было. Так адна жанчына ўсё носіць рэшатам, а яе муж мяшком сонца і пускаюць у хату.

А тут ідзе нейкі чалавек. Падышоў, павітаўся і пытаецца:

—  Што гэта вы, людзі, робіце? Яны пачалі бедаваць:

—  От паставілі хату ды ніяк у яе сонца не наносім, усё цёмна ды цёмна.

Тады чалавек пытаецца:

—  Што вы мне дасце за тое, што я вам упушчу сонца ў хату?

Жонка з мужам у адказ:

—  Што хочаш, тое і дамо.

Не ведалі людзі, што гэта быў сам Бог. А ён ім кажа:

—  Я нічога ад вас не хачу, адно дайце слова, што кожны тыдзень прымеце жабрака, накорміце і дазволіце пераначаваць.

Людзі пагадзіліся на тое.

Тады Бог ім вокны паўрэзваў, і відно стала ў хаце.